Nadakpan ang usa ka 49-anyos nga lalaki nga giila sa kapulisan nga High-Value Target atol sa buy-bust operation sa Purok 6, Barangay Poblacion, Barobo, Surigao del Sur niadtong Nobyembre 3, 2026.
Giila ang suspek nga si alyas “Nonoy,” minyo, usa ka gold panner ug residente sa maong lugar. Narekober gikan sa suspek ang 10 ka sachet sa gituohang shabu nga mitimbang og 5.60 gramos ug adunay gibana-banang kantidad nga ₱38,080.
Gipahigayon ang operasyon sa Drug Enforcement Unit sa Barobo Municipal Police Station, inubanan sa Philippine Drug Enforcement Agency (PDEA). Gawas sa ilegal nga droga, gikumpiskar usab ang cellphone, aluminum foil, pouch, ₱1,000 nga buy-bust money ug nagkadaiyang sensilyo.
Sa pagkakaron, anaa na sa kustodiya sa Barobo MPS ang suspek alang sa dokumentasyon ug tukmang disposisyon, samtang giandam ang kasong ipasaka batok kaniya.
Photo courtesy: Van Van Quezada-racho Abao
