Nadakpan sa hiniusang operasyon sa kapulisan ang Top 5 Regional Most Wanted Person nga nag atubang og kasong murder sa Barangay Poblacion, Rosario, Agusan del Sur niadtong Nobyembre 1, 2026. Giila ang dinakpan sa alyas nga “Lando,” 44 anyos, minyo ug mag-uuma, nga residente sa Barangay Bunawan Brook, Bunawan, Agusan del Sur.
Gipahigayon ang operasyon sa 1st Agusan del Sur Provincial Mobile Force Company (1st ADSPMFC) isip lead unit, kauban ang Regional Intelligence Division 13 (RID 13), Regional Intelligence Unit 13 – Provincial Intelligence Team Agusan del Sur (RIU 13 PIT ADS), Agusan del Sur Provincial Intelligence Unit (ADS PIU), ug Rosario Municipal Police Station (MPS).
Gidakop si Lando pinasikad sa Warrant of Arrest alang sa kasong Murder nga gipagawas niadtong Agosto 15, 2025, ni Hon. Emily Zen Y. Chua, Executive Judge sa Regional Trial Court, Branch 6, 10th Judicial Region, Prosperidad, Agusan del Sur. Wala usab girekomendar nga piyansa alang sa maong kaso.
Sa pagkakaron, anaa na sa kustodiya sa Rosario MPS ang dinakpan alang sa tukmang disposisyon ug pagsunod sa gikinahanglang legal nga proseso.
Photo courtesy: ADSPPO
