Nadakpan sa hiniusang operasyon sa kapulisan ang usa ka lalaki nga gikonsiderar nga Top 1 Most Wanted Person sa municipal level ug Top 10 sa regional level niadtong Nobyembre 2, 2026 sa Barangay Tagpupuran, lungsod sa Lingig, Surigao del Sur.
Giila ang nadakpan nga si alyas “Boy,” 33 anyos, usa ka mag-uuma ug residente sa maong lugar.
Gipangulohan ang operasyon sa mga personahe sa Lingig Municipal Police Station ubos sa pagpanguna ni PCPT Bernard D. Recamara, Acting Chief of Police, kauban ang mga sakop sa San Jose Municipal Police Station sa Negros Oriental Police Provincial Office.
Nadakpan ang suspek pinaagi sa duha ka Warrant of Arrest nga may kalabotan sa kasong Theft ubos sa Article 308 sa Revised Penal Code ug Rape ubos sa Republic Act No. 11648.
Ang warrant alang sa kasong Rape giisyu sa Regional Trial Court Branch 43, diin walay girekomendar nga piyansa, samtang ang warrant sa kasong Theft giisyu sa Municipal Trial Court sa Pamplona-Amlan-San Jose, Negros Oriental.
Sa pagkakaron ang suspek anaa na sa Lingig Municipal Police Station alang sa saktong disposisyon.
Photo courtesy: Lingig MPS
