Gipahayag ni House Deputy Minority Leader ug Akbayan Party-list Representative Chel Diokno ang iyang kakuwang sa katagbawan human wala iapil ni Presidente Ferdinand Marcos Jr. sa iyang mga priority measures alang sa special session ang mga balaodnon nga mosulbad sa taas nga singgilan sa kuryente sa nasod.
Partikular nga gitudlo ni Diokno ang ilang giduso nga balaodnon nga nagtumong sa pagtangtang sa 12% Value Added Tax (VAT) sa system loss sa kuryente aron mapagaan ang bayranan sa mga konsumidor.
Gawas niini, nanawagan usab ang kongresista nga hatagan og pagtagad ang resolusyon nga nag-imbestigar sa nagkalain-laing dugang singgilan nga gipasa ngadto sa publiko, ug ang pagsusi sa Philippine Energy Plan aron maseguro ang igong suplay sa enerhiya ug makunhuran ang pagsalig sa nasod sa imported nga lana.
Bisan pa man niini, gihangop ni Diokno nga nalakip sa ipahigayon nga special session karong adlawa, Hunyo 17, ang mga balaodnon alang sa sektor sa edukasyon.
Kini naglakip sa pag-amyenda sa Universal Access to Quality Tertiary Education Act, pagpalapdan sa School Feeding Program, ug ang pagtukod sa mga Last Mile Schools sa mga hilit nga dapit sa nasod.
Photo Courtesy: computer l HowStuffWorks
