Nasikop sa kapulisan ang usa ka High-Value Individual (HVI) nga giilang si alyas “Butchok” 64-anyos ug residente sa Barangay Caray-caray, Naval, Biliran atol sa buy-bust operation nga gipahigayon didto sa naasoy nga lugar, kagahapong adlawa.
Ang operasyon gipangulohan sa Biliran Provincial Drug Enforcement Unit (PDEU) uban sa mga operatiba sa Naval Municipal Police Station (MPS), Provincial Intelligence Unit (PIU) Biliran, ug Philippine Drug Enforcement Agency (PDEA) Biliran Provincial Office, ubos sa koordinasyon sa PDEA Regional Office VIII.
Nasikop ang suspek tungod sa giingong paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002, nga giusab pinaagi sa Republic Act No. 10640.
Narekober gikan sa iyang pagpanag-iya ang usa ka heat-sealed transparent plastic sachet nga adunay gidudahang shabu nga gipalit sa poseur-buyer, tulo pa ka dugang nga sachet nga adunay susamang substansiya, P500 nga gigamit nga buy-bust money, usa ka ID, Yamaha Vega nga motorsiklo ug uban pang drug paraphernalia.
Ang nadakpang suspek ug ang tanang ebidensiya gidala ngadto sa Naval Municipal Police Station alang sa hustong dokumentasyon ug disposisyon. Sa pagkakaron, giandam na sa mga awtoridad ang mga kasong kriminal batok kaniya may kalabotan sa pagbaligya ug pagpanag-iya og ilegal nga droga.
Photo Courtesy:Biliran Police Provincial Office
