Opisyal nang misulod isip varsity player sa Far Eastern University (FEU) ang batan-ong Leyteña athlete nga si Marjorie Daguil human sa iyang talagsaong gilas sa natad sa tracks and field.
Gawas sa pagsulod niini sa prestihiyosong unibersidad sa Manila, dako usab nga dungog ang gidala ni Daguil human kini malampusong nakasungkit og duha ka medalya sa bag-ohay lang nahatapos nga Philippine Athletics Championship.
Nasakmit ni Daguil ang Gold Medal sa 4×400-meter Relay ug Bronze Medal sa 4×100-meter Relay, nga nagpatingog sa iyang ngalan isip usa sa mga nag-unang batan-ong tulin modagan sa nasod.
Sa usa ka pamahayag gikan sa iyang mentor, gipadayag niini ang dako nga garbo ug pasalamat sa kalamposan sa maong atleta. Matud pa, ang maong dungog maoy bunga sa disiplina, sakripisyo, ug determinasyon ni Daguil sukad pa sa pagsugod sa iyang training.
Gipaabot usab sa kampo sa atleta ang kinasingkasing nga pasalamat ngadto sa Leyte Sports Academy (LSA) tungod sa dakong papel niini sa pag-umol, paghatag og dekalidad nga pagbansay, ug pag-abli og mga oportunidad aron masaligan ang abilidad sa mga batan-ong magduduwa sa probinsya ug makabot ang ilang mga damgo pinaagi sa paugnat sa kusog. Gilauman nga magsilbing inspirasyon si Daguil sa uban pang mga batan-ong atleta sa Eastern Visayas nga nagtinguha usab nga makasaka sa mas dako nga entablado sa esports sa nasod.
