Gipasalig sa Department of Trade and Industry (DTI) sa Bukidnon nga nagpabilin nga stable ug bastante ang supply sa mga basic necessities ug prime commodities sa tibuok probinsya, bisan pa man nga aduna gihapo’y namatikdan nga lihok o pagsaka sa presyo sa pipila ka mga produkto karong panahona.
Subay sa gipagawas nga Suggested Retail Price (SRP) bulletin niadtong Mayo 11, nasuta nga gikan sa 190 ka mga Stock Keeping Units (SKUs) nga ginamonitor sa ahensya, anaa sa 29% niini ang nitaas ang presyo. Samtang ang nahabilin nga 71% nagpabilin nga stable o wala milihok ang presyo.
Giangkon usab sa DTI nga dako ang kalambigitan sa maong pagsaka sa presyo ngadto sa natalang inflation rate sa nasod. Tungod niini, nagpadayon ang pakig-alayon sa DTI sa mga local government units (LGUs) pinaagi sa ilang Local Price Coordinating Councils, kauban ang uban pang ahensya sa gobyerno sama sa DA, DOH, DENR, ug DOE, aron subsob nga bantayan ang presyo sa merkado.
Nanawagan ang ahensya sa mga konsumidor nga sulayan sab pagpili sa uban pang mga brands nga mas barato apan aduna gihapo’y maayong kalidad kon itandi sa mga sikat nga brand pinaagi sa paghimo og canvas ug pagka-maalamon sa pagdumala sa budget aron mas makadaginot sa panggastos
Photo Courtesy: DTI – Bukidnon
