Gidayeg ni Pope Leo XIV, ang kagamhanan sa Espanya tungod sa lig-on niining baroganan batok sa mga giyera sa nagkadaghang dapit sa kalibutan, dungan sa paghatag og dakong suporta ngadto sa mga migrante. Gihimo sa Santo Papa ang maong pamahayag sa pagsugod mismo sa iyang opisyal nga pagbisita sa maong nasod, diin iyang gipasidunggan ang aktibong commitment sa Espanya alang sa kalinaw.
Atol sa usa ka reception uban nila King Felipe VI ug Queen Letizia didto sa royal palace sa Madrid, gipakita sa pontiff ang iyang pagsuporta sa gihimong lakang sa Espanya sa pagsunod sa international law ug sa multi-lateralism. Kahinumduman nga una nang nakiglantugi si Spanish Prime Minister Pedro Sanchez batok kang US President Donald Trump kalabot sa isyu sa Iran ug sa nagpadayong giyera sa Israel didto sa Gaza.
Sa iyang upat ka adlaw nga pagpuyo sa maong nasod, gawas sa pagpakig-atubang sa mga kadagkoan sa panggamhanan, duna usa’y mga sensitibong misyon nga pagahimoon ang Santo Papa. Lakip niini mao ang personal nga pakigkita sa mga biktima sa sexual abuse sulod mismo sa Simbahang Katoliko aron paminawon ang ilang mga mulo ug kasakit.
Sa pagtapos sa iyang itinerary, nakatala usab sa iyang eskedyul ang pakig-istorya sa nagkaduhang grupo ug organisasyon nga nag-atiman sa kaayuhan sa mga migrante. Gilauman nga ang maong pagbisita sa Santo Papa maghatag og mas lawom nga mensahe sa panaghiusa, hustisya, ug kalinaw taliwala sa nagka-grabe nga krisis ug tensyon nga giatubang sa tibuok kalibutan
Photo Courtesy: OSV News/Reuters
