Nagpagawas og bag-ong kamandoan ang Department of Education (DepEd) aron hatagan og dugang gahom ang mga school heads sa pagsuspinde sa klase sa higayon nga adunay katalagman. Ubos sa DepEd Order Number 14 series of 2026, gitugotan na ang mga pangutana sa tunghaan nga mopatuman og “granular suspension” o pinili nga pag-hunong sa klase base sa aktual nga sitwasyon sa ilang komunidad, inubanan sa koordinasyon sa School Division Superintendent ug sa lokal nga kagamhanan.
Pinaagi niini, gisiguro sa DepEd nga ang pag-kansela sa klase nakatarget lang sa mga apektadong classroom o grade level imbes nga i-suspinde ang tibuok dibisyon sa maong dapit. Tumong sa nasangpit nga bag-ong kamandoan nga mamahimong paspas, igo, ug haom ang pagresponde sa matag tunghaan alang sa kaluwasan sa mga magtutungha ug magtutudlo.
Ubos sa maong patakaran, upat ka bag-ong level-based learning continuity framework ang ipatuman nga mao ang “Hayo, Hinay, Hinga, ug Hinto.” Ang “Hayo” nagpasabot sa pagpadayon sa regular nga in-person learning basta luwas ang tanan; samtang ang “Hinay” mao ang pagpatuman sa flexible learning kon duna may gamay nga katalagman.
Sa pikas bahin, ang “Hinga” mao ang pagpagaan sa academic demands aron mahatagan og prayoridad ang kaluwasan sa mga estudyante, samtang ang “Hinto” mao ang hingpit ug temporaryong pag-hunong sa klase kung anaa na sa grabeng kakuyaw ang sitwasyon. Gilauman nga kining upat ka lebel maghatag og mas klaro nga giya sa mga magtutudlo ug ginikanan sa panahon sa mga kalamidad
Photo Courtesy: DepEd
