Gipasiugda sa lokal nga kagamhanan ug mga lumad nga komunidad ang kamahinungdanon sa pagpreserbar sa Binukid nga pinulongan ug kultura atol sa paga-abli sa selebrasyon sa ika-149 nga Aldaw ta Malaybalay ning bulan sa Hunyo 2026.
Sa maong okasyon, giawhag ang mga lumulupyo nga dili ikaulaw ang ilang lumad nga pinulongan kondili ipasigarbo kini ug padayon nga gamiton ug tun-an aron mapadayon ang kabilin sa ilang kultura ug pagkaila isip mga taga-Malaybalay. Nasugdan ang selebrasyon pinaagi sa Singampo, usa ka ritwal nga naglangkob sa pag-ampo alang sa giya, kalinaw, ug panalipod sa komunidad.
Gihimo ang kalihokan sa Plaza Rizal Park sa Barangay 8, Malaybalay City, diin nagtigom ang mga opisyal sa siyudad, mga lider sa komunidad, ug mga residente aron sa pagsaulog sa kasaysayan ug kultura sa dakbayan.
Gihatagan ug gibug-aton sa mga mensahe ni City Mayor Jay Warren Pabillaran, nga ang pagpadayon sa paggamit sa Binukid nga pinulongan usa ka importante nga lakang aron mapreserbar ang kultura ug mapasa kini ngadto sa umaabot nga mga henerasyon. Ang Aldaw ta Malaybalay maoy usa sa mga nag-unang kasaulogan sa siyudad nga nagtumong sa pagpasidungog sa kasaysayan, tradisyon, ug identidad sa mga taga-Malaybalay City
Base sa gipagawas opisyal nga kalendaryo sa mga kalihokan nga molungtad hangtod Hunyo 28, 2026, naglakip sa nagkadiyang sports tournaments, kultural nga mga tradisyon ug ang gpaabot nga Miss Q & A Malaybalay, pinakahighlight sa Hunyo 13, didto sa Bukidnon Sports Complex sa Barangay Laguitas. Gawas niini, gipaabot usab ang dagkong aktibidad sama sa Malaybalay City Marathon, Horse Show, ug Off-Road Competition.
Photo Courtesy: LGU Malaybalay City
