Nadakpan gilayon sa kapulisan ang suspetsado sa pagpatay sa usa ka lalaki nga nakit-an nga wala nay kinabuhi sulod sa iyang panimalay sa Purok 4, Barangay Laligan, Valencia City Hunyo 7, 2026.
Sumala sa inisyal nga imbestigasyon, ang suspetsado giila nga si Ronald Delarosa Albert, 47- anyos, residente sa Samal Island, Davao del Norte. Nasayran nga kauban sa biktima ang suspetsado sa pag-inom og ilimnong makahubog sa wala pa mahitabo ang krimen.
Ang pagdakop nahimo pinaagi sa padayon ug kusganong imbestigasyon sa Valencia City Police Station uban sa tabang ni Barangay Captain Jun Magallanes sa Barangay Laligan.
Una niini, nakaplagan patay na ang biktima nga si Jeffrey Mueco, 45-anyos, sulod sa panimalay, kinsa ulahing nakita pa siyang nakig-inom sa iyang mga barkada sa miaging adlaw ug mipauli sa iyang gipuy-an pagkahuman, nakit-an na lamang naligo na sa kaugalingong dugo.
Gibutyag usab sa imbestigasyon nga ang biktima gidunggab ug gilaslasan sa liog gamit ang usa ka mahait nga hinagiban.
Padayon pa ang kapulisan sa ilang imbestigasyon aron masayran kung aduna pay laing nalambigit sa maong krimen ug aron matino ang tibuok motibo sa pagpatay
Photo Courtesy: Valencia City Police Station
