Misamot ang kagubot sa liderato sa Senado human gibawi sa minorya ang kontrol sa sesyon ug gipahimutang si Senador Sherwin Gatchalian isip Senate President Pro Tempore nga maoy milingkod isip acting Senate President. Nahitabo kini human personal nga mitambong sa sesyon si Sen. Francis “Chiz” Escudero aron matubag ang duha ka adlaw nga kakulang sa quorum.
Sa katapusang adlaw sa legislative calendar, ang 11 ka miyembro sa minorya uban sa ilang kaalyado nakahimo og quorum ug gilusad ang reorganisasyon sa mga komite sa Senado. Gipili si Senador Juan Miguel Zubiri isip Majority Leader samtang gibawi usab gikan sa mga wala motambong nga senador ang pagpangulo sa daghang mga komite.
Lakip sa mga kausaban mao ang paghatag kang Senador Erwin Tulfo sa Blue Ribbon Committee nga nakatakdang magpahigayon og pagdungog bahin sa giingong anomalya sa flood control projects. Samtang si Senador JV Ejercito nahimong chairman sa Committee on Finance ug si Vicente Sotto III sa Committee on National Defense.
Bisan pa niini, wala mouyon si Senate President Alan Peter Cayetano sa nahitabong pag-ilis sa liderato. Matud niya, balido gihapon ang iyang pagmando isip Senate President ug magpadayon gihapon ang mga nakatakdang committee hearing bisan pa sa sine die adjournment sa Senado.
Sa pahayag sa bag-ong mayoriya, ilang gideklarar nga wala na sa posisyon si Cayetano isip Senate President human sa botohan sa 12 ka senador nga nagtambong sa sesyon. Apan alang kang Cayetano, nagpadayon gihapon ang iyang awtoridad ug nagmando siya sa mga opisyal ug empleyado sa Senado nga sundon ang iyang mga direktiba hangtod adunay pinal nga resolusyon sa kontrobersiya.
Photo Courtesy: Tatler Asia
