Usa ka hulagway sa usa ka amahan nga nagkugos sa iyang iro samtang ang iyang anak naglakaw tupad niya ang mikaylap ug nag-viral sa social media, hinungdan sa lain-laing reaksyon gikan sa publiko.
Sa sinugdan, daghang netizen ang natingala ug nangutana nganong ang iro pa man ang iyang gikugos imbes ang iyang anak. Apan sa dihang gipadayag ang rason, daghan ang nakasabot ug ni-react og positibo sa maong eksena.
Matod sa amahan, “Ang akong anak adunay sapatos, apan ang akong iro wala,” nga nagpasabot sa iyang pag-atiman sa kahimtang sa iyang alagang hayop ilabina sa grabeng kainit sa dalan.
Sumala sa mga eksperto ug animal welfare advocates, ang init kaayo nga semento mahimong makadaot sa mga tiil sa mga iro ug mahimong hinungdan sa sakit o paso. Tungod niini, daghang pet owners ang nagapangita og paagi aron maprotektahan ang ilang mga binuhi sa panahon sa init nga panahon.
Ang maong hulagway nahimong sentro sa diskusyon online bahin sa responsableng pag-atiman sa mga binuhing hayop, ug sa kamahinungdanon sa paghatag og proteksyon kanila sama sa pag-atiman sa miyembro sa pamilya.
Daghan usab ang nagkomento nga usahay ang mga aksyon nga murag katingad-an sa unang tan-aw adunay yano ra diay apan makapatandog nga rason sa likod niini.
Photo Courtesy: What’s up Tony
