Nakadawat og hito (catfish) fingerlings ang 20 ka backyard fish farmers sa Island Garden City of Samal (IGaCoS) gikan sa Bureau of Fisheries and Aquatic Resources (BFAR) Region XI niadtong Hunyo 1, 2026. Ang maong pagpanghatag gipahigayon pinaagi sa City Agriculture’s Office–Fisheries Division sa Community Fish Landing Area sa Barangay Peñaplata, Samal District.
Sa kinatibuk-an, 7,500 ka fingerlings ang gipang apod-apod ngadto sa mga benepisyaryo aron mapalambo ang produksyon sa isda sa isla. Gilauman nga makatabang kini sa pagdugang sa kita sa matag panimalay sa mga mananagat ug sa pagpalig-on sa suplay sa pagkaon sa syudad.
Sumala sa lokal nga pangagamhanan, kabahin kini sa ilang padayon nga paningkamot sa pagpalambo sa malungtarong pangisdaan ug paghatag og dugang panginabuhian sa mga mananagat . Pinaagi sa maong programa, gitinguha sa IGaCoS nga mapalig-on ang sektor sa pangisdaan ug masiguro ang pagkaon alang sa komunidad.
Photo Courtesy : Samal Island Information
