Kapin sa 4,300 ka mga benepisyaryo sa agrarian reform sa Caraga Region ang nakadawat og electronic land titles (e-titles) gikan sa Department of Agrarian Reform (DAR) atol sa usa ka seremonya nga gipahigayon sa Tandag City niadtong Martes, Hulyo 2, 2026.
Sa datos sa DAR, mikabat sa 4,342 ka Agrarian Reform Beneficiaries (ARBs) ang nakadawat sa ilang e-titles nga naglangkob sa kinatibuk-ang 10,130.41 ka ektarya nga yuta.
Ang pagpanghatag sa mga titulo gipangulohan ni DAR Undersecretary Kazel Celeste, kauban si DAR-13 Director Merlita Capinpuyan.
Gawas sa e-titles, nakadawat usab ang 373 ka ARBs og regular nga land titles nga naglangkob sa 507.90 ka ektarya pinaagi sa Regular Land Acquisition and Distribution Program sa DAR.
Dugang pa, sa pagpanghatag og mga titulo, naghatag usab ang DAR-Caraga og Certificates of Condonation with Release of Mortgage (COCROMs) ngadto sa 6,167 ka ARBs nga adunay kantidad nga P423.6 milyon ug naglangkob sa 11,727.10 ka ektarya nga yuta.
Ang COCROM gi-issue ubos sa Republic Act 11953 (New Agrarian Emancipation Act), nga gipirmahan ni President Ferdinand R. Marcos Jr. niadtong Hulyo 2023. Ubos sa maong balaod, gipapas ang tanang wala mabayring amortization, interes, ug silot sa mga yutang gihatag ngadto sa mga benepisyaryo ubos sa Comprehensive Agrarian Reform Program (CARP).
Sumala sa DAR, ang maong programa kabahin sa paningkamot sa gobyerno aron mapalig-on ang katungod sa mga mag-uuma sa ilang yuta, mapalambo ang ilang panginabuhian, ug madugangan ang produksyon sa agrikultura sa rehiyon.
Photo courtesy: DAR-13
