Nadakpan sa kapulisan ang usa ka 23-anyos nga lalaki nga giila sa alyas nga “Nabe” tungod sa kasong pagpanulis human sa gilusad nga hot pursuit operation sa Tandag Component City Police Station (CCPS) niadtong Hunyo 1, 2026.
Sumala sa kapulisan, ang suspek giakusahan nga nanulis sa Phoking Vietnamese Restaurant nga nahimutang sa Barangay Telaje, Tandag City.
Base sa imbestigasyon, positibong nailhan sa tag-iya ug mga empleyado sa restaurant ang suspek pinaagi sa CCTV footage nga nakakuha sa nahitabong krimen. Tungod niini, gilayon nga milihok ang intelligence operatives sa Tandag CCPS ug gilusad ang hot pursuit operation.
Nasikop ang suspek sa usa ka establisyemento sa Barangay Mabua, Tandag City. Narekober gikan kaniya ang P11,000 nga kantidad sa kwarta ug usa ka MEGAPAD 12 tablet nga nagkantidad og P8,000, nga gilauman nga mga gikawat nga butang gikan sa restaurant.
Human sa pagdakop, gipahibalo ang suspek sa iyang mga katungod ubos sa balaod ug gidala ngadto sa Tandag CCPS alang sa hustong dokumentasyon ug dugang imbestigasyon.
Gipangandaman na sa kapulisan ang pagpasaka og kaso nga Robbery batok sa suspek pinaagi sa inquest proceedings.
Photo courtesy: Tandag Component City Police Station
