Nakapatay ug kapin 21 ka indibidwal ang bag-ong missile ug drone attack sa Russia sa Ukraine lakip na niini ang duha ka bata, usa sa pinakadakong hulga sa miaging buwan. Labing grabe nga kadaot usab ang nasinati sa Dnipro diin 15 ang napatay, samtang 6 sa Kyiv.
Samtang gibutyag usab ni Ukarinian Presidente Volodymyr Zelensky, nga gitarget ang civilian infrastructure ug Energy facility nga mingresulta sa kapin 100 ka tao ang angol. Ang Kremlin mitug-an nga ang maong “systematic strikes” tubag sa giingong atake sa Ukraine sa usa ka dormitoryo sa Silangang bahin sa nasod. Sa tibuok gabii, gilusad sa Russia ang 656 ka drone ug 73 ka missile nga naglakip sa ballistic, cruise, ug anti-ship.
Gani si Zelensky nangayo og tabang gikan sa Estados Unidos alang sa Patriot missiles aron mapugngan ang dugang nga kadaot.
Ang mga lungsod sama sa Kharkiv ug Zaporizhzhia usab naapektuhan, samtang sa Kyiv daghang balay ug civilian facility ang nadaot, nagbilin og daghan ang samaran ug blackout. Ang trahedya nagpalalom sa kahimtang sa mga sibilyan kinsa padayon nga nag-antos sa walay hunong nga gubat.
Photo Courtesy: New York Times
