Gimandoan ni Israeli Prime Minister Benjamin Netanyahu ang militar sa Israel nga kontrolon ang hangtod 70 porsyento sa teritoryo sa Gaza isip kabahin sa ilang operasyon batok sa Hamas.
Matod ni Netanyahu, nga padayon nilang gipalig-on ang ilang kontrol sa Gaza ug gikan sa 60 porsyento nga ilang nahuptan karon, target nilang mapalapdan kini ngadto sa 70 porsyento.
Sumala pa sa Israeli Defense Forces , dul-an na sa 64 porsyento sa Gaza ang ilang kontrolado sukad sa katapusan sa Abril.
Gibasol usab sa Hamas ang Israel sa giingong paglapas sa kasabutan sa ceasefire nga gipatuman niadtong Oktubre 2025, ug giakusahan kini sa pagpahimutang og bag-ong kahimtang sa yuta pinaagi sa kusog militar.
Padayon usab ang mga airstrike sa Israel sa Gaza, diin sumala sa Palestinian health authorities, kapin 850 ka tawo na ang namatay sukad nagsugod ang ceasefire.
Sa laing bahin, gipahayag ni Israeli Defense Minister Israel Katz nga padayon nilang pangitaon ug targeton ang mga lider sa Hamas nga ilang giakusahan nga responsable sa pag-atake sa Israel niadtong Oktubre 7.
Photo Courtesy: Britannica
