Gihatagan og ultimatum sa Civil Aviation Authority of the Philippines ang AirAsia Philippines aron masettle ang kapin ₱271.9 milyon nga utang niini sa lain-laing airport fees ug charges.
Base sa cease-and-desist order nga gipetsahan og Hunyo 2, gimando ni CAAP Director General Raul del Rosario nga hunongon sa AirAsia ang operasyon niini sa mga airport nga ubos sa CAAP sulod sa tulo ka adlaw kon mapakyas kini sa pagbayad sa obligasyon.
Lakip sa wala mabayring bayronon ang air navigation charges, landing ug parking fees sa eroplano, passenger service charges ug uban pang airport assessments nga natigom sukad 2021 hangtod Mayo 2026.
Apan sumala sa CAAP, gihatagan pa nila ang AirAsia hangtod Hunyo 6 aron masulbad ang nahibiling obligasyon, ug padayon pa ang panaghinabi sa duha ka panig sukad pa niaging tuig.
Sa laing bahin, mipasalig ang AirAsia Philippines nga normal ug padayon gihapon ang ilang mga biyahe ug operasyon samtang ginasulbad ang maong isyu.
