Gimandoan sa Office of the Ombudsman ang Land Transportation Office (LTO) nga hunongon na ang paggamit sa Stradcom LTO-IT System ug hingpit nga ibalhin ang tanang transaksyon ngadto sa government-owned Land Transportation Management System (LTMS).
Nakalatid sa direktiba ni Ombudsman Jesus Crispin Remulla nga gipetsahan Mayo 29, ang LTMS nga unom na ka tuig nang operational kinahanglan na nga mao nalang ang gamiton sa paghatag serbisyo sa publiko.
Segon pa, adunay mga obserbasyon gikan sa Commission on Audit (COA) nga nagpakita og mga isyu sa kontrata sa Stradcom system ug posibleng paglapas sa mga balaod batok sa graft ug korapsyon.
Subay sa direktiba, gihatagan ang mga opisyal sa LTO og lima ka adlaw aron mosumite og action plan alang sa hingpit nga pagbalhin ngadto sa LTMS ug compliance report alang sa paghunong sa paggamit sa Stradcom system.
Gipasidan-an usab sa Ombudsman nga ang dili pagsunod sa maong direktiba mahimong mosangpot sa administrative cases ug preventive suspension.
Photo Courtesy: Philippine News Agency
