Nisaka ngadto sa 16.1% ang kinatibuk-ang external trade o patigayon sa gawas sa Pilipinas niadtong Abril ning tuiga, subay sa paunang datos nga gipagawas sa Philippine Statistics Authority (PSA).
Misaka ang kantidad sa patigayon ngadto sa $20.38 billion ikumpara sa $17.55 billion sa parehong bulan sa niaging tuig. Sa kinatibuk-an, ang mga produkto nga gi-import o gipalit gikan sa gawas naglangkob sa 64.6 porsyento, samtang ang gi-export o gibaligya sa gawas anaa lang sa 35.4 porsyento, nga miresulta sa trade deficit o alkansi nga mitala og $5.97 bilyon dolyares.
Bisan pa man niini, padayon gihapon nga misaka ang export sa nasod og 6.3% nga mitala og $7.21 billion. Ang labing dako nga usbaw narekord sa mga machinery and transport equipment, lana sa lubi, ug mga produkto sa mina. Ang mga electronic products gihapon ang nag-unang baligya sa Pilipinas sa gawas sa nasod diin mitala kini og $3.44 billion nga kita. Ang mga nag-unang nasod nga gidalhan sa mga produkto sa Pilipinas ang United States, China, Japan, Hong Kong, ug Singapore.
Sa pikas bahin, misaka og 22.4 porsyento ang kinatibuk-ang import sa nasod nga miabot sa kantidad nga $13.17 billion. Ang mga electronic products gihapon ang may labing dako nga kantidad sa importasyon nga miabot sa $4.22 billion, nga gisundan sa mga produktong petrolyo o lana, ug mga kahimanan sa transportasyon. Ang nasod sa China gihapon ang nagpabilin nga labing dako nga tinubdan sa mga imported nga produkto sa Pilipinas, nga gisundan sa Korea, Japan, Malaysia, ug Indonesia.
Photo courtesy: Yancy Lim/ Philippine News Agency
