Nahimong sentro sa tsismis ug kataw-anan ang usa ka maestra sa Buenos Aires, Argentina, human giakusahan matod pa nga kabit sa amahan sa iyang estudyante.
Imbes nga diretsong estoryahon ang isyu, adunay wala mailhing indibidwal nga naghimo pa gyud og dako kaayong tarpaulin ug gibutang sa atubangan sa eskwelahan aron ipahibalo sa tibuok komunidad ang maong alegasyon.
Nakurat ang mga ginikanan, estudyante ug mga silingan sa ilang nakita. Ang uban nangutana kung enrollment ba kini, raffle promo, o campaign poster. Apan sa ilang pagduol, alegasyon diay batok sa maestra ang naa sa tarpaulin.
Tungod sa kadako sa karatola, mas paspas matod pa kining mikatap kaysa tsismis sa group chat sa barangay. Ang uban nangomentaryo nga kung tinuod man gani ang reklamo, pwede ra unta isulat sa papel ug idala sa principal, dili kay himoong billboard nga mura’g advertisement sa softdrinks.
Wala pa makumpirma sa mga awtoridad ang kamatuoran sa alegasyon, apan daghan ang nagpahinumdom nga kinahanglan respetohon ang hustong proseso ug dili dayon maghimo og publikong pagpasipala.
Samtang dili pa klaro ang tinuod nga nahitabo, usa ka leksyon ang nakuha sa kadaghanan: kung naa kay reklamo, ayaw dayon pagpa-print og tarpaulin. Basin ang printer pa ang unang makabalo sa imong sekreto.
Photo courtesy: Oddity Central
