Nanguna si Bise Presidente Sara Duterte sa presidential preference survey alang sa eleksyon sa 2028 ug sa net satisfaction ratings tali sa mga taas nga opisyal sa gobyerno, subay sa managlahing survey sa Pulse Asia ug Social Weather Stations (SWS). Gihimo kini nga mga survey sa wala pa siya gi-impeach sa Ubos-Balay-Balaoranan o Kamara niadtong Mayo onse tungod sa mga alegasyon sa korapsyon ug pagluib sa pagsalig sa publiko. Gikatakda sab magsugod ang iyang impeachment trial didto sa Senado karong Hulyo sais.
Sa survey sa Pulse Asia nga gipahigayon niadtong Mayo tres hangtod siyete, singkwentay-uno porsyento (51%) sa mga respondent ang nibutyag nga iboto nila si Duterte isip presidente kon gihimo pa karon ang eleksyon, samtang nisunod kaniya si kanhi Bise Presidente ug karon Mayor sa Naga City nga si Leni Robredo nga nakakuha og 41%. Labing kusog ang suporta ni Duterte sa Mindanao diin nakuha niya ang 91% kumpara sa 7% ni Robredo. Alang sa pagka-bise presidente, nanguna si Senador Erwin Tulfo batok kang Senador Robinhood Padilla.
Sa pikas bahin, ang survey sa SWS niadtong Marso nakatala og 54% nga natagbaw sa performance ni Duterte, nga naghatag kaniya og net satisfaction rating nga +29 o giila nga “moderate.” Nakakuha siya og +82 o “excellent” nga rating sa Mindanao. Sa laing bahin, nakadawat si Senate President Tito Sotto og “moderate” +15 nga rating, samtang parehong “neutral” ang nakuha ni Speaker Faustino Dy ug Chief Justice Alexander Gesmundo.
Photo courtesy: Social Weather Stations/Facebook
