Gibutyag ni Israeli Prime Minister Benjamin Netanyahu niadtong Domingo nga nagkasabot sila ni US President Donald Trump nga ang bisan unsang pinal nga kasabutan uban sa Iran kinahanglan mapahunong ang giingong nuclear threat sa Islamic republic.
Sumala ni Netanyahu, nagkaistorya sila ni Trump niadtong Sabado sa gabii diin gihulagway sa Estados Unidos nga positibo ug maayong panaghisgot. Lakip sa ilang gikasabutan ang pagwagtang sa uranium enrichment facilities sa Iran ug pagtangtang sa enriched nuclear materials gikan sa teritoryo niini.
Gipasiugda usab sa lider sa Israel nga pareho gihapon ang ilang baruganan ni Trump nga dili dapat makabaton og nuclear weapons ang Iran aron malikayan ang dugang tensyon sa rehiyon.
Gihisgutan usab sa duha ka lider ang memorandum of understanding kabahin sa posibleng pag-abli pag-usab sa Strait of Hormuz nga usa sa pinakaimportanteng ruta sa suplay sa lana. Matud pa ni Netanyahu, padayon nga lig-on ang alyansa sa Israel ug Estados Unidos ilabina sa seguridad ug depensa batok sa mga hulga sa rehiyon lakip na ang sitwasyon sa Lebanon.
Photo courtesy: New Vision
