Arestado ang usa ka motorcab driver human kining nakuhaan sa marijuana ug shabu pinaagi sa gilusad nga search warrant operation sa kapulisan sa Purok Trigo, Brgy. Sta. Cruz, Dapitan City, Zamboanga Del Norte niadtong Mayo 22,2026.
Giila ang dinakpan nga si alyas Mike, 50-anyos, minyo, residente sa nasangpit nga dapit ug giilang Street level individual sa Drug’s Watchlist sa Dapitan City Police Station.
Narecover gikan sa posisyon sa suspetsado ang 4 ka gagmayng sachet ug usa ka medium sized nga sachet sa shabu nga motimbang ug 3 ka gramo nga nagkantidad ug Php20,400.00 ug usa ka pack sa marijuana nga motimbang sa 10 gramos nga nagkantidad ug Php1, 200.00.
Dugang narecover gikan sa dinakpan ang digital weighing pocket scale, plastic film sealer ug uban pang mga non-drug items.
Gipangunahan sa City Drug Enforcement Team sa Dapitan CPS ang maong operasyon kauban ang 1st ZNPMFC ug Mabuhay SBC 5th SOU Maritime Group bitbit ang search warrant nga giissue sa Presiding Judge, 9th Judicial Region, RTC, Office of the Executive Judge, Dipolog City sa paglapas sa RA 9165 kon Comprehensive Dangerous Drugs Act of 2002.
Ang suspetsado gikustudiya sa Dapitan City Police Station alang sa tukmang disposisyon.
Photo Courtesy: Mahisa Shily
