Nadakpan ang usa ka lalaki nga wanted tungod sa kasong pagpatay sa hiniusang operasyon sa kapulisan sa pagpanguna sa Provincial Intelligence Unit (PIU), kauban ang mga sakop sa Kapatagan Municipal Police Station (MPS) ug Linamon MPS ubos sa Lanao del Norte Police Provincial Office (LDN PPO), sa koordinasyon sa Don Carlos MPS sa may alas 2:30 sa hapon sa Purok 8, Barangay San Nicholas, Don Carlos, Bukidnon.
Giila ang suspek nga si alyas “Junie,” 43 anyos, minyo, ug residente sa maong barangay. Subay sa report, gidakop ang suspek pinasikad sa warrant of arrest nga giisyu ni Judge Jacob T. Malik sa Regional Trial Court (RTC), Branch 21, sa ika-12 nga Judicial Region nga nahimutang sa Kapatagan, Lanao del Norte may kalabotan sa Criminal Case No. 21-1573, nga gipetsahan niadtong Mayo 6, 2008, alang sa kasong murder ug adunay piyansa nga girekomenda sa korte alang sa temporaryong kagawasan.
Sa pagkakaron, gidala ang suspek sa kustodiya sa Kapatagan MPS alang sa dokumentasyon ug sa hustong proseso sa balaod.
Photo Courtesy: PNP Lanao del Norte
