Gipahigayon sa Municipal Disaster Risk Reduction and Management Office (MDRRMO) ug Municipal Engineer’s Office (MEO) ang clearing operation sa Sitio Anaman, Barangay New Cortez, New Corella, Davao del Norte, isip kabahin sa padayong disaster response sa lungsod human sa mga insidente sa landslide.
Gideploy sa mga otoridad ang bug-at nga makinarya sama sa backhoe aron limpyohan ang mga natumpag nga yuta ug tangtangon ang mga babag nga resulta sa landslide.
Pinaagi niini, tumong sa lokal nga panggamhanan nga mapasig-uli ang kahapsay sa apektadong lugar ug mapalig-on ang kaluwasan sa mga residente.
Padayon usab ang koordinasyon sa mga hingtungdang opisina alang sa pagmonitor sa kahimtang sa maong lugar ug sa pagpatuman sa dugang nga mga lakang aron mapanalipdan ang kinabuhi ug kabtangan sa katawhan.
Samtang, giawhag ang publiko nga maglikay sa mga lugar nga apektado sa landslide ug sa mga bakilid nga posibleng matumpag pag-usab, ilabi na kon magpadayon ang pag-ulan.
Gipahinumdoman usab ang mga residente nga kanunayng mosunod sa mga pahimangno ug instruksyon sa lokal nga mga awtoridad aron malikayan ang posibleng peligro.
Photo Courtesy: MDRRMO New Corella
