Gipalig-on sa kapulisan sa Talaingod, Davao del Norte ang kampanya sa pagpalapad sa kahibalo sa publiko bahin sa West Philippine Sea pinaagi sa hustong pagpakaylap sa impormasyon, pagpausbaw sa nasudnong kahibalo, ug pagdasig sa responsableng pagpaambit sa mga balita.
Pinaagi sa usa ka information campaign sa Talaingod Municipal Police Station, giawhag ang katawhang Pilipino nga masayod sa mga kamatuoran bahin sa West Philippine Sea, ilabina sa mga katungod sa Pilipinas nga giila ubos sa internasyonal nga balaod, lakip na ang 2016 Arbitral Award.
Gipasiugda usab sa kampanya ang kamahinungdanon sa pagkuha og kasaligang impormasyon gikan sa opisyal nga mga tinubdan sa gobyerno, sama sa Department of Foreign Affairs (DFA) ug Philippine Coast Guard (PCG), ingon man sa mga kasaligang news outlet.
Giawhag ang publiko nga likayan ang pagtuo ug pagpakaylap sa mga peke nga balita o makapahisalaag nga impormasyon nga mahimong hinungdan sa kalibog sa katawhan bahin sa mga isyu sa West Philippine Sea.
Dugang pa niini, giawhag ang mga Pilipino nga ipaambit ang tukmang impormasyon ngadto sa ilang pamilya, mga higala ug komunidad aron mapalambo ang panaghiusa ug kahibalo sa nasudnong interes.
Pinaagi niini nga kampanya, gilauman nga mas mapalambo ang kahibalo ug pagpakabana sa katawhan sa pagpanalipod sa interes sa Pilipinas sa West Philippine Sea.
Photo Courtesy: PNP Talaingod Municipal Police Station
