Kasamtangang anaa si Presidente Ferdinand “Bongbong” Marcos Jr. sa Singapore alang sa iyang opisyal nga pagbisita, nga molungtad hangtod sa Oktubre 11, pinaagi sa imbitasyon ni Prime Minister Lawrence Wong.
Usa sa mga nag-unang kalihokan mao ang pagtambong sa ika-24 nga Forbes Global CEO Conference, diin makigkita ug makig-estorya ang presidente sa mga dagkong negosyante ug mamumuhunan gikan sa Singapore ug sa tibuok kalibutan. Didto iyang ipakita ang daghang mga oportunidad sa Pilipinas — ilabi na sa natad sa digital technology, artificial intelligence (AI), advanced manufacturing, imprastraktura, enerhiya, ug serbisyong panglawas.
Gipasabot ni PBBM nga importante ang maong pagbisita tungod kay ang Singapore mao ang mopangulo sa ASEAN sa tuig 2027.
Lakip usab sa iyang programa ang pagbisita sa Singapore Nuclear Research and Safety Institute, aron masusi ug matun-an ang kasinatian sa nasud sa paggamit ug pagpanalipod sa teknolohiyang nukleyar. Sa katapusang adlaw sa iyang pagbisita, motambong usab ang presidente sa Singapore Grand Prix.
Samtang wala ang presidente, gimanduan na niya sila si Executive Secretary Ralph Rector, Agrarian Reform Secretary Conrado Estrella, ug Justice Secretary Frederick Vida, uban sa ubang mga opisyal, aron sila ang magdumala sa nasud sa iyang pagkawala.
Photo Courtesy: Philippine Information Agency
