Malampuson nga nakatabok sa Strait of Hormuz ang usa ka South Korean tanker human nakig-alayon sa nasod sa Iran, sumala sa taho sa South Korea niadtong Miyerkules.
Kini ang labing unang higayon nga adunay barko gikan sa nasod nga nakalabang sa delikadong ruta sukad mibuto ang gubat tali sa Estados Unidos ug Iran niadtong ulahing bahin sa Pebrero.
Gibutyag ni Foreign Minister Cho Hyun nga mabinantayong naglayag ang tanker nga nagkarga og duha ka milyon ka bariles nga crude oil, ug luwas na kini nga nakagawas uban ang napulo ka South Korean crew members.
Matod pa sa Foreign Ministry sa South Korea, ang operasyon gihimo pinaagi sa koordinasyon sa mga hingtungdang nasod, lakip na ang Iran, aron masiguro ang kaluwasan sa barko. Sumala sa Bloomberg ug MarineTraffic, ang nakalabang ang Universal Winner, usa ka dako kaayong crude carrier nga gipadagan sa kompanyang HMM ug nagdala og lana gikan sa Kuwait padulong sa Ulsan. giklaro usab sa gobyerno nga walay gibayran nga bisan unsang transit fee o security charge ngadto sa Iran baylo sa luwas nga pag-agi sa barko.
Gibana-bana nga moabot ngadto sa 26 ka mga barko sa South Korea ang natanggong o anaa dapit sa Strait of Hormuz, diin kapin 88 ka adlaw na nga naapektuhan ang mga commercial shipping tungod sa tensyon sa Middle East.
Gumikan niini, padayon karon ang pakig-istorya ug negosasyon sa gobyerno sa South Korea ngadto sa Iran pinaagi sa mga tawag sa telepono sa ilang mga foreign minister ug pagpapadala og special envoy aron masiguro usab ang luwas nga paglawig sa nahabiling 25 pa nila ka mga barko sa dapit.
Photo courtesy:www.chosun.com
