Nakigkoordinar ang gobyerno sa Pilipinas ngadto sa Netherlands aron maseguro ang hustong pag-atiman sa 38 ka Filipino crew members sa MV Hondius nga kasamtangang naka-quarantine human sa outbreak sa hantavirus.
Ang pahayag gihimo sa Department of Health human magkita si Health Secretary Ted Herbosa ug Dutch Health Minister Sophie Hermans atol sa World Health Assembly sa Geneva.
Sumala sa Department of Migrant Workers (DMW), negatibo sa hantavirus ang tanang Filipino crew members apan padayon gihapon silang ginamonitor lakip ang ubang pasahero.
Matod sa World Health Organization (WHO), ang unang duha ka pasyente usa ka Dutch couple nga nakabiyahe gikan sa Argentina, Chile ug Uruguay sa wala pa sila mosakay sa cruise ship.
Gituohang posible silang natakdan pinaagi sa exposure sa mga ilaga nga nagdala sa hantavirus. Apan giingon sa WHO nga walay ilaga nga namatikdan sulod sa barko, hinungdan nga gisusi usab ang posibleng talagsaong human-to-human transmission sa virus.
Ang MV Hondius gikatakdang moabot sa Rotterdam alang sa disinfection ug dugang quarantine measures sa nahibiling crew members ug medical staff.
Photo Courtesy: Balita
