Napakyas ang National Food Authority (NFA), nga makuha ang target procurement buffer stock sa unang quarter ning tuiga tungod sa agresibong pagpamalit og humay sa mga pribadong traders.
Base sa datos, 13 mil kapin lamang ka metric tons sa humay ang napalit sa NFA gikan Enero hangtod sayong bahin sa Mayo, nga ana-a sa 4.2 porsyento sa ilang target nga kapin 313 mil metric tons.
Matod ni NFA Administrator Larry Lacson, mas taas ang presyo nga gitanyag sa mga pribadong negosyante ngadto sa mga mag-uuma maong daghang farmers ang mipili nga didto ibaligya ang ilang ani.
Bisan pa niini, giingon sa NFA nga nakabenepisyo usab ang mga mag-uuma tungod sa mas taas nga farmgate prices sa humay.
Dugang pa ni Lacson, mas gipakusogan karon sa ahensya ang pagpamalit og humay sukad niubos ang presyo niini pagsugod sa bulan sa Abril aron mapalig-on ang buffer stock sa gobyerno.
Gihangyo usab sa NFA ang mga mag-uuma nga rehistrado ubos sa Registry System for Basic Sector in Agriculture o RSBSA nga ibaligya ang ilang humay ngadto sa ahensya isip suporta sa programa sa gobyerno nga P20 kada kilo nga bugas.
Samtang, giingon ni Agriculture Secretary Francisco Tiu Laurel Jr. nga kinahanglan padayon nga mapalig-on sa NFA ang suplay sa bugas ilabina karon nga nagkaduol ang lean months ug sunod nga harvest season.
Photo Courtesy: Pilipino Mirror
