Misaka karon ang presyo sa pipila ka mga gulay ug bugas sa PrimeMarket-Surigao City, base sa pinakaulahing monitoring sa merkado.
Lakip sa mga adunay taas nga presyo mao ang carrots nga gikan 200 hangtod 250 pesos kada kilo, samtang ang radish, kulikot ug patatas usab misaka ngadto sa 150 pesos kada kilo. Ang luy-a ana-a sa 180 pesos kada kilo ug ang ahos 120 pesos matag kilo.
Ang presyo sa bombay ug kamatis nagkantidad usab gikan 100 ngadto sa 120 pesos kada kilo, samtang ang talong naa sa 100 pesos kada kilo. sibuyas dahon naa sa 90 pesos, samtang ang lemonsito 50 pesos kada kilo.
Sa bahin sa bugas, ang Tonner rice nagpresyo gikan 53 ngadto sa 57 pesos kada kilo, samtang ang Red Rice ana-a sa 65 pesos kada kilo. Ang malagkit usab adunay presyo nga 50 hangtod 55 pesos kada kilo.
Padayon nga gibantayan sa mga konsyumer ang pagsaka ug paglihok sa presyo sa mga baligya sa merkado ilabina sa mga nag unang panginahanglanon sa kada panimalay.
