Nakigpulong kang Pangulong Ferdinand “Bongbong” Marcos Jr. si Paraguay President Santiago Peña sa Malacañang aron mapalig-on ang relasyon sa duha ka nasud sa larangan sa kalakalan, pamuhunan, ug agrikultura.
Miabot si Peña sa Pilipinas niadtong Mayo 10 gikan sa Taipei ug gisugat sa mga opisyal sa gobyerno sa Ninoy Aquino International Airport. Sa wala pa ang opisyal nga panagtagbo sa Malacañang, mibisita usab siya sa Luneta aron maghalad og bulak isip kabahin sa state visit ceremony.
Sumala sa Malacañang, gilauman nga mopirma ang duha ka lider og mga kasabutan nga magpalapad sa kooperasyon sa nagkalain-laing sektor tali sa Pilipinas ug Paraguay.
Gipadayag usab ni president Peña nga nakita sa Paraguay ang Pilipinas isip usa ka mahinungdanong merkado sa Asya, ilabina sa aspeto sa trade ug koneksyon sa Capricorn Bi-Oceanic Corridor nga magsumpay sa Brazil, Paraguay, Argentina, ug Chile.
Ang maong pagbisita mao ang unang state visit sa usa ka presidente sa Paraguay sukad natukod ang diplomatikong relasyon tali sa Pilipinas ug Paraguay niadtong 1962.
Photo Courtesy : Inquirer.net
