Patay ang usa ka 38-anyos nga lalaki human gitigbas sa wala pa mailhing suspek sa Purok 5, Sitio Layungon, Barangay Pongol, Libona, Bukidnon niadtong nakalabay nga adlaw.
Sa imbestigasyon, nasayrang ang biktima, matod pa impluwensyado sa ilimnong makahubog miadto sa balay sa 42-anyos nga suspetsado ug walay klarong rason iyang giguba ang solar, Bluetooth speaker, ug atop sa balay.
Sa pag-abot sa suspek ug pagkahibalo sa nahitabo, iyang gikomprontar ang biktima, nga miangkon sa iyang gibuhat. Misulay pa og pakig-areglo ang amahan sa biktima, apan misamot ang tensyon sa dihang kalit nga gisumbag sa biktima ang suspek.
Tungod niini, gigamit sa suspek ang iyang sundang ug gitigbas ang biktima sa ulo, abaga, ug dughan nga miresulta sa iyang hinanaling kamatayon.
Misurender sab ang suspetsado sa Barangay Captain sa Barangay Pongol ug karon anaa na sa kustodiya sa Libona Municipal Police Station, kauban ang sundang nga gigamit sa krimen alang sa hustong dokumentasyon ug disposisyon
Photo Courtesy: Libona Municipal Police Station
