Gitaktak na sa pwesto ang usa ka pulis human malambigit sa viral CCTV footage nga nagpakita sa giingong pagpangulata sa usa ka babaye sa Bulacan.
Matod ni Police Colonel Jay Baybayan, Officer-in-Charge Director sa Bulacan Provincial Police Office, gilayon nilang giimbestigahan ang insidente human mikatag ang video sa hitabo nga nahitabo niadtong Marso 12, 2026
Gikumpirma usab sa Malolos City Police Station nga relieved na sa iyang pwesto ang maong pulis ug karon anaa na sa restrictive custody samtang padayon ang imbestigasyon.
Gikuha na usab sa Philippine National Police ang service firearm ug PNP ID sa suspek, aron malikayan ang posibleng pagpanghadlok o pag-abuso.
Padayon karon nga ginakuha sa mga imbestigador ang pahayag sa duha ka panig samtang nangandam na usab ang biktima sa pagsaka og kaso batok sa pulis.
Gikondena sa Malolos PNP ang bisan unsang matang sa kapintasan batok sa kababayen-an ug gitiyak sa NAPOLCOM nga ilang bantayan ang hapsay nga pagpadayon sa imbestigasyon.
Photo Courtesy: Malolos CPS- Bulacan PPO
