Angol ang usa ka 33-anyos nga cellphone technician human kini gipusil sa Barangay Silik, Pikit, Cotabato pasado alas 6:00 sa gabii niadtong nakalabay nga adlaw. Giila ang biktima nga si Haron Kudarat, minyo ug residente sa Barangay Bualan, Tugunan SGA, apan nagpuyo na usab sa Barangay Silik human makapangasawa didto.
Base sa inisyal nga imbestigasyon, naghulog lamang og coins ang biktima sa usa ka vendo peso WiFi sa dihang kalit siyang gipusil sa wala pa mailhing mga suspek. Nadamay usab ug nasamaran ang anak sa usa ka barangay kagawad sa Silik nga anaa sa duol asa nahitabo ang krimen.
Daling gidala sa ospital ang biktima ug sa ulahi gidala sa mas dakong tambalanan tungod sa mga samad sa nagkalainlaing bahin sa iyang kalawasan.
Padayon karon ang imbestigasyon sa mga otoridad aron mailhan ang mga responsable sa maong pagpamusil.
