Gikumpirma sa Department of Migrant Workers (DMW) nga ipaubos sa quarantine sa Rotterdam ang 38 ka mga Pilipinong seafarer gikan sa cruise ship nga MV Hondius. Kini human makatala og outbreak sa hantavirus sa maong barko diin tulo na ang namatay, lakip ang magtiayong Dutch ug usa ka German national.
Gipahayag ni DMW Secretary Hans Leo Cacdac nga upat na ka tripulante ang gipalupad paingon sa Netherlands niadtong Mayo 10, samtang 20 pa ang mosunod, ug ang nahabiling 14 ka deck ug engine crew magpabilin sa barko paingon sa Rotterdam
Matod ni Health Secretary Ted Herbosa, moabot sa 42 ka adlaw ang quarantine protocol ug ipaubos una sila sa testing sa dili pa tugotang makapauli sa Pilipinas. Anaa sa maayong kahimtang ang mga Pinoy crew ug nagnegatibo sila sa maong virus sa pagkakaron.
Giklaro sa DMW nga magpabiling aktibo ang ilang mga kontrata ug makadawat gihapon sila og suholan samtang naka-quarantine, diin ang tag-iya sa barko ang moabaga sa tanang gastusan didto sa Netherlands.
Giklaro usab ni Secretary Herbosa nga wala pa’y natala nga kaso sa hantavirus sa Pilipinas ug dili kini angay ikabalaka nga mahimong sama sa COVID-19 pandemic tungod kay ubos ang risgo niini sa tibuok kalibutan.
Photo Courtesy: USA Today
