Gipadayag sa Presidente sa Democratic Republic of Congo nga posible siyang modagan pag-usab isip presidente sa maong nasud bisan paman ug humana ang iyahang duha ka termino isip Pangulo. Matod niya, mahimo lamang kini kung mosugot ang katawhan pinaagi sa referendum o botohan aron mausab ang konstitusyon tungod duha ka termino lamang ang gitugot sa balaod nga mahimong presidente ang usa ka indibidwal.
Giingon usab sa maong Presidente nga posible dili matuman sa tukmang oras ang eleksyon sa tuig 2028 tungod sa padayong kagubot sa sidlakang bahin sa nasud. Nagpadayon gihapon ang away tali sa militar ug sa grupo sa rebelde nga M23 nga nihawid sa pipila ka lugar sa North ug South Kivu sa maong lugar.
Gisaway usab sa presidente ang kasikbit nila nga nasud ug giakusahan nga maoy nahimulos sa mga mineral resources sa Congo ug nakapahinay sa peace agreement. Apan gilimod sa kini sa pikas nasud ang maong alegasyon nga nagsuporta sila sa M23 nga rebeldeng grupo.
Sa laing bahin, nagpasidaan ang oposisyon sa maong nasud nga ang posibleng pag-usab sa konstitusyon aron madugangan ang termino sa presidente mahimong abuso sa gahum. Sa pagkakaron, wala pa’y pinal nga desisyon kabahin sa referendum ug sa umaabot nga eleksyon sa nasud.
Photo Courtesy: Bloomberg.com
