Nagbuga na usab og baga nga abo ang Bulkang Sakurajima sa Kagoshima, Southern Japan kagahapon. Miabot sumala sa taho sa gibana-banang 3,500 metros ang katas-on sa gibuga nga volcanic ash, nga maoy hinungdan sa ashfall sa pipila ka komunidad nga duol sa palibot sa bulkan.
Sumala pa sa Japan Meteorological Agency, nagpabilin sa Alert Level 3 ang Bulkang Sakurajima busa hugot gihapon nga gipahimangnoan ang mga residente ug mga anaa sa danger zones batok sa posibleng volcanic hazards.
Lakip sa ginabantayan sa mga otoridad ang posibleng dugang nga ashfall, volcanic rocks, ug uban pang peligro nga mahimong resulta sa padayong aktibidad sa bulkan.
Dugang pa niini, gi-awhag sa mga otoridad ang publiko nga likayan ang pagpaduol sa restricted areas ug kanunay nga sundon ang mga emergency advisories aron malikayan ang disgrasya.
Sa pagkakaron, wala pa makatala og report sa mga nasamdan o grabeng kadaot tungod sa pagbuga sa bulkan, apan padayon nga ginamonitor sa mga otoridad sa Japan ang sitwasyon.
Sa kasamtangan, nagpabilin nga alerto ang mga lokal nga ahensya sa emerhensya samtang giandam usab ang mga residente kung posible nga mosamot pa ang volcanic activity sa maong lugar
Photo Courtesy:Sakurajima Destination
