Gipasakaan na og reklamo sa Office of the Ombudsman ang usa ka kanhi opisyal sa Department of Public Works and Highways ug usa ka contractor tungod sa nalangan nga flood control project sa Mountain Province.
Ang reklamo gisang-at ni Anti-Corruption Advocate Juniper Dominguez, batok kang Khadaffy Tanggol ug sa kompanyang MG Samidan Construction niadtong Abril 10.
Si Tanggol, nga kanhi regional chief sa DPWH-Cordillera, gi-assign na karon sa rehiyon sa Bicol. Lakip usab sa gireklamo ang representante sa contractor, mga miyembro sa bids and awards committee, mga project signatories ug auditors nga nalambigit sa implementasyon sa proyekto.
Ang maong flood control project nga nagkantidad og P96.4 milyon nahimutang sa Barangay Masablang, Paracelis, ug gihatag ngadto sa contractor niadtong Hunyo 10, 2024. Target unta kini nga mahuman sa sayong bahin sa 2025.
Apan sumala sa reklamo, Disyembre 2025 martod pa nagsugod ang aktuwal nga trabaho sa proyekto ug hangtod Abril 2026 padayon gihapon ang konstruksyon.
Gipasanginlan ni Dominguez ang mga respondent og technical malversation, graft, dishonesty ug falsification of documents, uban sa posible nga paglapas sa anti-corruption and government procurement laws.
Gipangutana usab sa complainant ang pipila ka mga gasto sa proyekto sama sa mobilization fees, safety measures, tree removal ug construction materials, ilabina kon unsaon pagkwenta sa maong mga kantidad.
Gusto usab masayran ni Dominguez kon adunay hustong material testing nga gihimo ug kon kinahanglan pa ba og dugang pondo tungod sa dugay nga paghuman sa proyekto.
Photo Courtesy:Philstar
