Gisaway ni Senador Erwin Tulfo ang giingong padayon nga paglapas sa kasamtangang price freeze sa pipila ka mga magpapatigayon, ug nanawagan sa Department of Trade and Industry (DTI) nga mohimo og aktuwal nga inspeksyon sa mga merkado aron maseguro ang proteksyon sa mga konsumidor.
Gipatuman sa DTI ang price freeze hangtod Mayo 10 isip tubag sa pagsaka sa presyo sa produktong petrolyo ug sa epekto sa tensiyon sa Middle East. Pero sumala kay Tulfo, may mga report nga wala ginasunod ilabi na sa mga gagmay nga tindahan ug sa lokal nga merkado.
Matod sa senador, ang mga konsumidor nga nagsalig sa gagmay nga mga tindahan maoy labing apektado sa maong gawi, sanglit limitado ang ilang pagpili sa pagpalit sa mga batakang panginahanglan.
Dugang pa niya nga dili igo ang pagsalig lamang sa mga taho ug mga dokumento. Siya miingon nga ang DTI kinahanglang magtukod ug mas aktibong presensya sa mga merkado pinaagi sa on-ground inspections.
Photo Courtesy: SENATE OF THE PH
