Kapin sa siyam ka kilo sa gituohang marijuana nga gibana-bana mokabat sa ₱1,016,000 ang nasakmit sa Police Regional Office 12 sa buy-bust operation sa Silway Darimco, Barangay Dadiangas West, General Santos City, niadtong nakalabay nga adlaw.
Naaresto ang 21 anyos nga suspek nga gitawag sa alias “Mels,” residente sa Barangay Fatima, Gensan. Gipahigayon ang operasyon alas 8:42 sa gabii sa mga operatiba sa Police Station 1 ug City Intelligence Unit.
Nakuha gikan sa suspek ang usa ka sachet nga gituohang marijuana nga gigamit sa buy-bust operation, walo ka pakete nga pormag tisa, ug 61 pa ka sachet sa gituohang marijuana. Nasakmit usab ang ₱1,000 nga buy-bust money ug ubang personal nga butang.
Atubangon sa suspek ang mga reklamo tungod sa gituohang paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Samtang, gipasalig ni PRO 12 Director PBGen Alan B. Manibog nga ipadayon ang kampanya batok sa ilegal nga droga aron mapanalipdan ang komunidad. Padayon ang imbestigasyon ug pag-andam sa mga dokumento alang sa pormal nga pagpasaka sa mga reklamo batok sa suspek.
