Naluwas sa kapulisan ang 11 ka menor de edad sa managlahing operasyon batok sa online sexual abuse and exploitation of children o OSAEC sa General Santos City. Base sa report niadtong nakalabay nga adlaw, tulo ka Pilipino ang giila sa mga imbestigador nga giingong nalambigit sa pagpahimulos sa mga bata.
Sumala kang Philippine National Police Women and Children Protection Center (PNP-WCPC) Chief PBGen. Maria Sheila Portento, nasuta sa pagsusi sa mga electronic device sa usa ka American national nga nadakpan sa Chicago ang iyang komunikasyon sa tulo ka Pilipino nga giingong mga facilitator nga nakabase sa GenSan.
Duha sa tulo ka suspek ang nadakpan, samtang ang usa nagpabiling wala pa madakpi. Lakip sa mga nadakpan ang mga ginikanan nga giingong nalambigit sa pagpahimulos sa kaugalingon nilang mga anak.
Gituohang gigamit ang mga bata sa pagbaligya og mga materyales nga adunay seksuwal nga pag-abuso sa mga menor de edad ug sa livestreaming sa seksuwal nga mga buhat alang sa mga langyaw nga kustomer.
Matud ni Portento, ipaubos sa assessment ug psychosocial intervention ang mga batang giluwas, uban sa tabang sa mga social worker, aron matabangan sila sa pag-ayo ug pagbangon gikan sa ilang nasinati nga pag-abuso.
Gipasiugda usab sa WCPC chief nga dili mahimong rason ang kakabos aron pakamatarungon ang pagpahimulos sa mga bata. Ang kantidad nga giingong nalambigit sa maong mga kaso mokabat lamang gikan sa pipila ka gatos ka pesos hangtod ₱3,000.
Gipasabot ni Portento nga magpadayon ang mga otoridad sa pag-imbestigar sa mga kaso sa OSAEC ug makigtambayayong sa mga langyaw nga ahensiya sa pagpatuman sa balaod ug mga online platform aron mapanubag ang mga responsable sa pagpahimulos sa mga bata.
