Arestado ang 26 anyos nga construction worker nga giila sa alyas “Goliath” human nasakmitan og gituohang shabu nga nagkantidad og ₱70,176 sa buy-bust operation sa Barangay City Heights, General Santos City, ala-1:41 sa kaadlawon niadtong nakalabay nga adlaw.
Gipahigayon ang operasyon sa City Police Drug Enforcement Unit, City Intelligence Unit ug Police Station 4 sa General Santos City Police Office sa eskina sa Aparente ug Rosas Streets, Block 5, Dadiangas Heights Subdivision.
Narekober gikan sa suspek ang kapin 10.32 gramos nga gituohang shabu, lakip ang buy-bust item, cellphone, sling bag, coin purse ug ₱726 nga cash, ingon man ang ₱1,000 nga buy-bust money.
Nag-atubang ang suspek og kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002, ug giandam na ang mga reklamo alang sa inquest proceedings.
