Arestado ang upat ka suspek sa ilegal nga droga human nasakmit sa mga otoridad ang gituohang shabu nga nagkantidad og kapin sa ₱1.03 milyones sa buy-bust operation sa Barangay Rizal Poblacion, Banga, South Cotabato niadtong Oktubre 16, 2026.
Gipangunahan sa Regional Special Enforcement Team sa PDEA Region 12 ang operasyon, uban sa tabang sa PDEA South Cotabato Provincial Office, 16th Military Intelligence Company, 6th Military Intelligence Battalion ug 6th Infantry Battalion sa Philippine Army.
Giila lamang sa mga alyas nga “Toto,” 26 anyos, salesman; “Rizal,” 20 anyos, estudyante; “Marvin,” 33 anyos, freelance event host; ug “Kimberly,” 25 anyos, housekeeper, ang mga nadakpan.
Si “Toto” residente sa Barangay Malaya, samtang si “Rizal” nagpuyo sa Barangay San Vicente. Si “Marvin” ug “Kimberly” mga residente sa Barangay Rizal Poblacion, Banga, South Cotabato.
Narekober sa operasyon ang lima ka heat-sealed plastic sachet nga adunay puti nga kristal nga substansiya nga gituohang shabu. Usa niini ang gigamit sa buy-bust transaction, samtang ang upat pa gikataho nga narekober gikan sa mga suspek.
Nasakmit usab ang usa ka tinuod nga ₱1,000 nga kuwarta nga gigamit isip buy-bust money, boodle money, usa ka cellphone, motorsiklo, itom nga sling bag ug gamay nga timbangan.
Atubangon sa upat ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002. Padayon ang PDEA Region 12 sa pagpahigayon og mga operasyon batok sa ilegal nga droga pinaagi sa intelligence-driven operations ug pakigtambayayong sa ubang ahensiya sa gobyerno.
