Arestado sa kapulisan ang usa ka 56-anyos nga lalaki nga giilang alyas “Al” atol sa pagpatuman sa search warrant sa Sitio Crossing, Barangay Tinimbacan, Banisilan, Cotabato, alas-4:55 sa kaadlawon niadtong Oktubre 19, 2026. Nakumpiskar gikan sa iyang pinuy-anan ang usa ka homemade 12-gauge pistol nga walay serial number. Ang operasyon gipahigayon sa Banisilan Municipal Police Station kauban ang nagkadaiyang yunit sa kapulisan ug Philippine Army, subay sa Search Warrant No. 26-041 nga giisyu sa Regional Trial Court Branch 28.
Ang suspek, nga usa ka furniture maker ug residente sa maong lugar, giatubang ang kaso tungod sa giingong paglapas sa Republic Act No. 10591 o Comprehensive Firearms and Ammunition Regulation Act. Gibutang na sa kustodiya sa Banisilan Municipal Police Station ang suspek ug ang nakumpiskang armas alang sa hustong dokumentasyon ug disposisyon.
Photo courtesy: PNP Cotabato Police Provincial Office
