Nadakpan sa kapulisan ang usa ka wanted person nga giatubang ang kasong multiple murder ug multiple frustrated murder atol sa intelligence-driven manhunt operation sa Barangay Logpond, Siay, Zamboanga Sibugay, alas-7 niaging gabii.
Sumala sa report sa Zamboanga Sibugay Police Provincial Office, gipahigayon ang operasyon sa mga personnel sa Siay Municipal Police Station, kauban ang Human Rights PNCO ug mga miyembro sa 106th Infantry Battalion sa Philippine Army, ilalom sa Charlie Company. Ang nadakpan nga suspek usa ka minyo nga lalaki ug residente sa Barangay Sta. Fe, Titay, Zamboanga Sibugay.
Ang pagdakop gihimo pinasikad sa warrant of arrest nga giisyu niadtong Hulyo 16, 2003 sa Regional Trial Court Branch 28 sa Liloy, Zamboanga del Norte. Ang suspek giatubang ang duha ka kaso nga nalista ubos sa Criminal Case Numbers L-00690 ug L-00691, diin walay girekomendar nga piyansa.
Human sa pagdakop, gipahibalo ang suspek sa hinungdan sa iyang pagkadakop ug sa iyang mga katungod ubos sa Konstitusyon, gamit ang pinulongan nga iyang nasabtan. Sa pagkakaron, anaa na siya sa kustodiya sa Siay Municipal Police Station alang sa hustong disposisyon ug sa pagbalik sa warrant of arrest ngadto sa korte nga nag-isyu niini.
