Nadakpan sa kapulisan ang usa ka lalaki atol sa buy-bust operation nga gipahigayon sa Municipal Drug Enforcement Team sa Titay Municipal Police Station, kauban ang Zamboanga Sibugay 2nd Provincial Mobile Force Company, sa Barangay Kitabog, Titay, Zamboanga Sibugay niadtong nakalabay nga adlaw.
Nakuha gikan sa operasyon ang upat ka pakete sa gidudahang shabu, nga may gibana-banang gibug-atong usa ka gramo ug adunay standard drug price nga Php 6,800.00.Narekober usab ang usa ka 500 peso bill nga marked money ug uban pang Drug paraphernalia.
Gibutyag sa kapulisan nga gihimo ang pagrekord sa operasyon pinaagi sa body-worn camera ug alternatibong recording device. Gisaksihan usab sa barangay kagawad, representante sa media, ug human rights personnel ang pag-inventory sa mga nakumpiskang ebidensiya.
Gidala sa Zamboanga Sibugay Provincial Forensic Unit ang nasampit ng butang alang sa eksaminasyon, samtang ang nadakpang suspek gidala sa Titay Municipal Police Station alang sa hustong disposisyon ug pagpasaka sa kasong paglapas sa Republic Act 9165 o Comprehensive Dangerous Drugs Act of 2002, pinaagi sa inquest proceedings.
