Nagtinguha ang Department of Finance kon (DOF) nga ipaubos sa 2 porsyento ang bayad sa pagpadala og kwarta sa Pilipinas sa mga Overseas Filipino Workers (OFWs), aron mas dako ang bahin sa ilang kinitaan ang makaabot sa ilang mga pamilya. Sumala ni Finance Secretary Frederick Go, anaa sa 6.3 porsyento ang kasagarang bayad sa remittance, base sa datos sa World Bank.
Nakigpulong si Go sa mga opisyal sa global payment firms nga Swift ug Revolut atol sa 2026 International Monetary Fund-World Bank annual meetings sa Bangkok, Thailand, aron hisgutan ang mga paagi sa pagpaayo sa kapaspas, pagkaabot-kaya, ug transparency sa pagpadala og kwarta ngadto sa Pilipinas. Lakip sa gihisgutan ang koordinasyon sa mga bangko ug payment providers, ingon man ang pagdugtong sa mga payment system aron mas sayon nga maabot ang mga Philippine bank account ug digital wallet ang kwarta.
Gipasiugda usab ni Go ang kamahinungdanon sa patas nga exchange rates ug mas ubos nga transaction fees, human sa mga reklamo sa pipila ka OFW bahin sa taas nga bayad nga mokabat sa 8 hangtod 10 porsyento. Samtang, sumala sa Bangko Sentral ng Pilipinas (BSP), mikunhod ngadto sa $3.03 bilyon ang cash remittances niadtong Agosto, nga maoy pinakaubos sulod sa tulo ka bulan. Ang kinatibuk-ang remittances sa unang walo ka bulan sa tuig miabot sa $23.42 bilyon, ug gilauman sa BSP nga moabot sa $36.6 bilyon ang cash remittances karong tuiga.
Photo courtesy:www.dof.gov.ph
